Волковысский педколледж

Навучальны семінар па стварэнні электронных вучэбна-метадычных комплексаў

У сучаснай педагагічнай прасторы актыўна развіваецца прымяненне інфармацыйных тэхналогій, дыстанцыйная форма навучання нарматыўна замацаваная ў новым Кодэксе аб адукацыі Рэспублікі Беларусь. Педагагічны калектыў Ваўкавыскага каледжа працуе над рэалізацыяй эксперыментальнага праекта па стварэнні і апрабацыі сучасных адукацыйных электронных рэсурсаў. З гэтай нагоды для выкладчыкаў быў праведзены чарговы навучальны семінар, на гэты раз па стварэнні электронных вучэбна-метадычных комплексаў (ЭВМК), які наладзіла выкладчык Іна Уладзіміраўна Малчанава. Яна прадэманстравала магчымасці стварэння згаданага адукацыйнага рэсурса на Google Дыску. Сэрвісы Google з’яўляюцца надзвычай прыдатнымі для стварэння электронных вучэбна-метадычных комплексаў; яны не патрабуюць выдаткаў на набыццё складанага праграмнага абсталявання; яны падтрымліваюць усе аперацыйныя сістэмы, што выкарыстоўваюцца выкладчыкамі і навучэнцамі; яны бясплатныя. Іна Уладзіміраўна пазнаёміла ўдзельнікаў семінара са спосабамі стварэння, рэдагавання, захоўвання дакументаў, стварэння спасылак (для чытання, каментавання, выканання заданняў). Выкладчыкі мелі магчымасць стварыць уласныя ЭВМК, сістэматызаваць матэрыял у іх належным чынам, бо Google прадастаўляе неабходныя інструменты для распрацоўкі электронных метадычных кейсаў разнастайнай тэматыкі і спецыфікі, якія возьмуць у актыўны спажытак педагогі Ваўкавыскага каледжа.

Н.В. Лазарчык, метадыст
Здымкі прадастаўлены аўтарам

Опубликовано 26 апреля 2022 г.