Волковысский педколледж

Завяршэнне экскурсійнага сезона 2022/2023 навучальнага года

12 ліпеня ўдзельнікі аб’яднання па інтарэсах “Вытокі” завяршылі экскурсійны сезон 2022/2023 навучальнага года экскурсіяй па гісторыка-краязнаўчаму музею Ваўкавыскага каледжа для наведвальнікаў прышкольнага дзіцячага лагера ДУА “Сярэдняя школа №5 г.Ваўкавыска”. На працягу чэрвеня-ліпеня музей каледжа наведалі больш за 120 вучняў сярэдніх школ №7 і №5 горада, а таксама наведвальнікі Цэнтра Тэхнічнай Творчасці.
Змяніўся фармат экскурсіі па музею каледжа, дабаўлена выкарыстанне сучасных IT-тэхналогій. Цяпер знаёмства з побытам жыхароў Ваўкавышчыны пачынаецца з відэафрагментаў, на якіх можна ўбачыць працу майстроў-рамеснікаў, сельскагаспадарчыя заняткі вяскоўцаў, што выклікае сапраўдную цікавасць наведвальнікаў. Пад час экскурсіі па музею вучні яшчэ раз знаёмяцца з прыладамі працы і рэчамі паўсядзённага побыту жыхароў Ваўкавышчыны даіндустрыяльнага перыяду. Заканчваецца экскурсія віктарынай на тэму народных промыслаў.
Для вучняў старэйшага ўзросту дэманструецца відэафільм пра каледж, яго спецыяльнасці, праводзіцца аглядная экскурсія па нашай навучальнай установе. Такім чынам, вучні школ набываюць веды не толькі па гісторыі і краязнаўству, а і аб каледжы, што ў далейшым можа садзейнічаць іх прафесійнаму выбару.
Экскурсіі па гісторыка-краязнаўчаму музею і па каледжы праводзілі навучэнцы спецыяльнасці “Турызм і гасціннасць” Навінка Аляксандра, Кузняцова Аліна, Грэнь Алёна, Дзейкала Максім, Федунец Фёдар. Для нашых навучэнцаў гэта з’яўляецца сапраўдным практычным вопытам, які абавязкова спатрэбіцца ў будучай прафесіі.

А.У.Жывіца, кіраўнік музея
Здымкі прадстаўлены аўтарам

Апублікавана 12 ліпеня 2023 г.

Перейти в архив всех новостей