Волковысский педколледж

Крыштальны звон роднага слова!

21 лютага ва ўсім свеце адзначаецца Міжнародны дзень роднай мовы.
Мова – частка чалавечай культуры, гістарычнай спадчыны. Дзякуючы ёй, працягваюць жыць традыцыі. Мова абуджае цікавасць да пазнання свету, садзейнічае праяўленню павагі да нашага мінулага і служыць элементам аб’яднання людзей незалежна ад месца і часу іх пражывання.Таму і Дзень роднай мовы асаблівы для кожнай нацыі, для кожнага народа.
Якая прыгожая, мілагучная, мяккая і ў той жа час яскравая, звонкая, моцная, поўная наша мова. На кожны выпадак знойдзецца ў ёй і патрэбнае слова, і трапны фразеалагізм.
Сённяшняя раніца была не зусім звычайнай: на першым паверсе, каля ўваходу, прадстаўнікі групы 1-21 сустракалі навучэнцаў, выкладчыкаў і супрацоўнікаў каледжа цёплымі беларускімі словамі і шчырымі пажаданнямі на роднай мове, а таксама праводзілі акцыю - “Мяняем цукерку на беларускае слова”. І як прыемна было, калі штохвілінна чулася бадзёрае “Добрай раніцы”, мілагучнае “Калі ласка”, знаёмае “Дзякуй”, аптымістычнае “Цудоўнага настрою”.
Ну а закончылі святакаванне мерапрыемствам “Крыштальны звон роднага слова”. Тут былі песні на роднай мове, вершы, разнастайныя па тэматыцы. Дзякуючы падрыхтаваным выступленням, прысутныя змаглі адчуць творчы патэнцыял і майстэрства чытальнікаў, дакрануцца да непаўторнага каларыту нашай культуры, меладычнасці гучання роднай мовы. Дзякуй усім, хто прымаў удзел у дадзеным мерапрыемстве.
Беларускае слова зачароўвае сваёй мілагучнасцю, напеўнасцю, нагадвае пра самае вялікае багацце, якое даецца ад нараджэння кожнаму чалавеку. Родная мова − гэта найбольшы скарб для кожнага народа. Любіце і шануйце самы дарагі скарб Бацькаўшчыны - нашу мову!

Макавецкая К.З., куратар 1-21 групы

Здымкі прадстаўлены аўтарам