Агульнакаледжная дыктоўка «Мы-купалаўцы»
У рамках святкавання Міжнароднага дня роднай мовы ў Ваўкавыскім каледжы адбылася акцыя “Мы – купалаўцы”, у якой прынялі ўдзел аматары беларускай мовы. Удзельнікі пісалі дыктант “Пад іменем Купалы”. Адчуванне прыналежнасці да вялікай купалаўскай сям’і (больш за чатырнаццаць з паловай тысяч чалавек!), у якой пануе згода, павага і ўзаемадапамога, не пакідала ўсіх прысутных. Пачуццё гонару перапаўняла думкі за знакамітых выпускнікоў-купалаўцаў, якія ў розных кутках нашай Радзімы і за яе межамі паспяхова рэалізавалі свой інтэлектуальны і творчы патэнцыял. Гучанне беларускага слова зачаравала сваёй мілагучнасцю, напеўнасцю, нагадала пра самае вялікае багацце, якое можна назваць простым словам з няпростым сэнсам, – спадчына. Бясспрэчна, ужо восем дзесяцігоддзяў купалаўцаў яднаюць галоўныя рысы характару: любоў да роднай зямлі, пашана да яе запаветных багаццяў і духоўных каштоўнасцей, імкненне да прафесіяналізму і майстэрства ў працы.
Белавус В.М., выкладчык каледжа
 
 
 
Апублікавана 21 лютага 2020 г.
Перейти в архив всех новостей
|
