Шануйце роднае слова!
21 лютага ва ўсім свеце адзначаецца Міжнародны дзень роднай мовы.
Мова – частка чалавечай культуры, гістарычнай спадчыны. Дзякуючы ёй, працягваюць жыць традыцыі. Мова абуджае цікавасць да пазнання свету, садзейнічае праяўленню павагі да нашага мінулага і служыць элементам аб’яднання людзей незалежна ад месца і часу іх пражывання.
Якая прыгожая, мілагучная, мяккая і ў той жа час яскравая, звонкая, моцная, поўная наша мова. На кожны выпадак знойдзецца ў ёй і патрэбнае слова, і трапны фразеалагізм.
Таму і Дзень роднай мовы асаблівы для кожнай нацыі, для кожнага народа. З гэтай нагоды па ініцыятыве выкладчыкаў цыклавой камісіі філалагічных дысцыплін і пры актыўнай падтрымцы навучэнцаў у Ваўкавыскім каледжы былі падрыхтаваны і праведзены мерапрыемствы, прымеркаваныя да гэтага свята.
21 лютага на першым паверсе, каля ўваходу, дзяжурная група сустракала навучэнцаў, выкладчыкаў і супрацоўнікаў каледжа цёплымі беларускімі словамі і шчырымі пажаданнямі на роднай мове. І як прыемна было, калі штохвілінна чулася бадзёрае “Добрай раніцы”, мілагучнае “Калі ласка”, знаёмае “Дзякуй”, аптымістычнае “Цудоўнага настрою”…
Навучэнкі групы 1-31 арганізавалі адмысловую акцыю “Гавары са мной па-беларуску”. А традыцыйны рытарычны конкурс “Беларусь мая сінявокая” прайшоў не ў зусім традыцыйным фармаце: удзельнікі прадставілі на конкурс запісы сваіх выступленняў. Аднак гэта не перашкодзіла і адчуць творчы патэнцыял і майстэрства канкурсантаў, і дакрануцца да непаўторнага каларыту нашай культуры, меладычнасці гучання роднай мовы. Пераможцамі ж у конкурсе сталі: 1 месца - Чалоўская Ганна (1-21 група), 2 месца - Хімерык Вольга (5-13 група) і 3 месца - Трайгель Валерыя (1-31 група). Нельга не адзначыць і музычны нумар навучэнкі 4-11 групы Казанцавай Алесі. Усе выступоўцы, а таксама вядучыя атрымалі ад прафкама студэнтаў сімвалічныя падарункі. Віншуем пераможцаў! І вялікі дзякуй усім, хто прымаў удзел у дадзеным мерапрыемстве.
Да ўвагі аматараў беларускай літаратуры была аформлена выстава “Пісьменнікі-юбіляры”.
Гучанне беларускага слова зачаравала сваёй мілагучнасцю, напеўнасцю, нагадала пра самае вялікае багацце, якое даецца ад нараджэння кожнаму чалавеку. Родная мова − гэта найбольшы скарб для кожнага народа. Яна адлюстроўвае яго характар, гісторыю, вопыт, робіць нас унікальнымі. Давайце берагчы нашу мову!
Макавецкая К.З., куратар 1-31 групы
 
 
 
 
 
 
 
Опубликовано 22 февраля 2022 г.
Перейти в архив всех новостей
|
ДО 85-ЛЕТИЯ КОЛЛЕДЖА:
Поиск по сайту
Последние новости
ТОП-10
|
